ئه‌ڤین ئاسۆ سه‌لامه‌ته‌

به‌رپرسێک له‌ که‌ناڵ چوار-کۆره‌ک تیڤی ،ده‌نگۆی‌ برینداربونی‌ بێژه‌ری‌ که‌ناڵه‌که‌ ئه‌ڤین ئاسۆی‌ ره‌تکرده‌وه‌و راشیگه‌یاند به‌مزوانه‌ به‌رنامه‌ی‌ تۆ نمونه‌یت ده‌ستپێده‌کاته‌وه‌.

پاش ئه‌وه‌ی‌ ده‌نگۆی ئه‌وه‌ بڵاوبۆوه‌ که‌ به‌ڕێوه‌به‌ری‌ که‌ناڵ چوار و پێشکه‌شکاری کۆره‌ک تیڤی‌ (ئه‌ڤین ئاسۆ) بریندار کراوه‌ به‌و هۆیشه‌وه‌ به‌رنامه‌ی‌ تۆ نمونه‌یت راگیراوه‌، سه‌رچاوه‌یه‌کی له‌ که‌ناڵ چوار-کۆره‌ک تیڤی به‌ سایتی‌ خه‌ندان – ی‌ راگه‌یاند ئه‌و ده‌نگۆیانه‌ ناڕاستن و به‌ پڕوپاگه‌نده‌ی‌ خه‌ڵکی‌ ناوبردو وتی‌:" 5ی ئه‌م مانگه‌ یاخود 11ی ئه‌م مانگه‌ به‌رنامه‌که‌ پێشکه‌شده‌کرێت."

هاوکات به‌رپرسه‌که‌ی‌ که‌ناڵ‌ چوار-کۆره‌ک تیڤی ،ئاماژه‌شی‌ به‌وه‌کرد ستافی‌ به‌رنامه‌ی‌ تۆ نمونه‌یت به‌ ئه‌ڤین ئاسۆشه‌وه‌ خه‌ریکی‌ ئاماده‌کردنی‌ منداڵه‌ به‌شداربوه‌کانی‌ به‌رنامه‌که‌ن بۆ خولی‌ کۆتایی‌ و دواکه‌وتنی‌ به‌رنامه‌که‌ش به‌هۆی‌ ئه‌م هۆکاره‌وه‌ بووه‌.

سه‌رچاوه‌که‌ که‌ نه‌یویست ناوی‌ ئاشکرابکرێت وتیشی‌ " ئه‌ڤین سه‌لامه‌ته‌ و ته‌ندروستی‌ زۆر باشه‌".

به‌رنامه‌ی‌ تۆنمونه‌یت به‌رنامه‌یه‌کی‌ پڕجه‌ماوه‌ری‌ هه‌فتانه‌ی‌ ته‌رفیهیه‌ له‌ کۆره‌ک تیڤی پێشکه‌ش ده‌کرێت و تێدا چه‌ند منداڵێک راده‌هێنرێت بۆ ئه‌وه‌ی‌ ببنه‌ گۆرانیبێژ و به‌هره‌کانیان بخه‌نه‌ کار.