هانی‌ دوو هاوسه‌ر له‌یه‌کتر جیاده‌کاته‌وه‌

به‌هۆی‌ ئه‌وه‌ی‌ دیواری‌ سه‌رجه‌م ژووره‌کانی‌ ماڵه‌که‌ی‌ پڕکردووه‌ له‌ وێنه‌ی‌ خانمه‌ گۆرانیبێژ هانی‌ و به‌رده‌وام سی دی‌ گۆرانییه‌کانی‌ ئه‌و لێده‌دات، ژنێکی‌ دانیشتووی‌ شاری‌ سه‌قز له‌ کوردستانی‌ ڕۆژهه‌ڵات، له‌ دادگای‌ لێکۆڵینه‌وه‌ی‌ ئه‌و شاره‌ سکاڵایه‌کی‌ یاسایی‌ دژ به‌ هاوسه‌ره‌که‌ی‌ تۆمارکرد و داوای‌ جیابوونه‌وه‌ی‌ کرد.

نووسه‌ر و ڕۆژنامه‌نووس نه‌جده‌تی‌ ڕه‌حیمی‌، له‌ په‌یوه‌ندییه‌کدا له‌ کوردستانی‌ ئێرانه‌وه‌ به‌ (ئاسۆ)ی‌ ڕاگه‌یاند: "ژنه‌که‌ له‌ سکاڵاکه‌یدا باسی‌ له‌وه‌ کردووه‌ که‌ مێرده‌که‌ی‌ ماوه‌ی‌ چه‌ند ساڵێکه‌ ماڵه‌که‌ی‌ پڕکردووه‌ له‌ وێنه‌ی‌ جۆراوجۆر و کاسێت و سی دی‌ گۆرانییه‌کانی‌ هانی‌، به‌رده‌وام خه‌وی‌ پێوه‌ده‌بینێ‌ و هیواداره‌ ڕۆژێک له‌ نزیکه‌وه‌ بیبینێت، له‌به‌رئه‌وه‌ حه‌زناکات چیتر له‌گه‌ڵیدا ژیان به‌سه‌ربه‌رێت، چونکه‌ هه‌موو شتێکی‌ لێ بۆته‌ هانی‌ و لایه‌نه‌کانی‌ دیکه‌ی‌ ژیانی‌ فه‌رامۆشکردووه‌".